السلام عليكم و رحمه الله و بركاتو

انا اسمي احمد مترجم فى الامارات اول ما رحت الامارات مكنتش لاقى شغل و كده يعنى سئلت على اي حاجه امشي بيها نفسى لقيت ان فيى الوسيط بيطلب ناس توزع جرايد كل يوم خميس حوالي تلات اربع ساعات و مبلغ مش وحش اخر كل شهر يعنى اي حاجه تسند الزير

المهم

اول يوم خميس نزلتو و نزل معايا واحد من الشركه نفسها عشان يوريني الخط بتاعي

الخميس الى بعدو نزلتو لوحدي طبعا على اعتبار اني عرفت الخط و كده

بس فا انا كنت بوزع جرايد على فلل اسمها الفشت

في منطقه فى الشارقه

الفلل دي ضلمه جدا جدا جدا فوق ما تتخيلو يعنى .. المهم حكايتي مع الفلل دي مش قادر اقولكو انا بخاف جدا من الضلمه و يعنى الوضع اصلا وضع نيله يعنى بالليل و بتلف على كل باب تحط عليه الجريده

و فيلا يكون حاطين عليها لمبه مثلا و فيلا تانيه لا ... عملت حسابي و اشتريت كشاف صغير كده كان كشاف على ما تفرج بس اهو كان اي حاجه تنورلي



بدايه كده في مره و انا ماشى فى وصله بين مجموعه فيلل و مجموعه تانيه حته حوالي 100 متر رمل اصفر كلها

و سمعت صوت بحه كده او حاجه بتجري صوت حركه مع صوت ممكن تقولو نهنهه او نهجان ممكن

طبعا انا حاطط على كتفي شنطه و الكشاف في ايدي مكنش منور ساعتها مجاش في بالي انورو يعنى غير لما حسيت بالصوت دا

و هوب الاقي كلب بيجري عليا بيني و بينو مفيش خمسه سته متر و ضلمه انا بحكيلكو و انا بفتكر مش قادر اوصفلكو بصراحه انا كان ايه شعوري ممكن تقولو ان شعري ابيض و دقني طولت فى جزء من الثانيه اجري منو يجري ورايا و قفت و لفيتلو فى الكحل دا و حدفتو بجرنال من معايا خاف و جري و جاي عليا تاني كبشت حاجه من الارض كده شويه تراب فيهم حصا خفيف و رحت رامي عليه و ربنا سترها و راح جاري ...


و انا مش قادر اوصفلكو فعلا احساسي كان ايه حاولو تحطو نفسكو مكاني كده و تجربو تشوفو انتو ممكن تعملو ايه انا معرفش انا ربنا سترها معايا ازاي انا دايما و انا بشتغل الشغلانه دي بقرا قران طول ما انا ماشى عشان بدخل فى اماكن ضلمه ربنا الى يعلم بيها

و شويه بعد ما طلعت على منطقه نور وقفت فيها شويه ارتاح من الى شفتو دخلت تاني الفيلل عشان اخلص الشغل عشان لو عدي عليا مراقف يوديني في داهيه و انا لو مخلصتش شغلي

ما علينا الكلام دا كان الساعه حوالي 4 الفجر ممكن و لقيت واحد بعجله كده ساحبها جمبو و ماشى و انا ماشى من بعيد و راح داخل فيلا طب دا يطلع ايه هو انا ناقص يخرب بيت دي شغلانه طب دا دخل الفيلا الى انا هوزعها دلوقتي ؟

طب هل دا مواطن ؟؟

طب و هو المواطن هيسحب عجله و يمشى بالليل كده .. الفيلل دي فيلل مواطنين اقل عربيه راكنه لاند كروزر

طب اعمل ايه


قلت اعمل نفسى مش شايفو


رحت احط الجرنال لقيتو فى وشي و بيبرقلي استجمعت قوايا و حطيت الجرنال و بلف و همشي لقيتو الى يبقولي





















انت ليش ما تقول السلام عليكم

انت ما في اسلام ولا في اسلام طلع هندي بيلم زباله







انا مش هقولكو قلتلو ايه لاني مش فاكر قلت ايه ساعتها بس انا كنت هلبسو الشطنه فى دماغو بس مسكت نفسى ... او كنت هنط في كرشو

معرفش كنت هعمل ايه بس مسكت نفسى




و عدي الموقف على خير و انا طالع و بلعن اليوم الى اشتغلت فيه الشغلانه الطين دي



حصل معايا موقفين كمان بس الوقت اتاخر و انا عندي شغل الصبح بدري



ان شاء الله احكيهم يوم تاني





اخوكم فى الله احمد